花旗參無花果豬展湯
因為買咗個真空煲，所以令到我更加的起心肝煲多d湯水畀自己同老公滋潤下。今個星期一就煲咗依款簡單易煲嘅秋冬滋潤湯水-花旗參無花果豬展湯。
材料: 花旗參 2湯匙 / 無花果 5粒 / 豬展 $20 / 水 2.5L
做法: 先洗淨所有材料，花旗參用半碗水浸15分鐘，豬展用熱水拖一拖，煲滾2.5L水後放入所有材料，浸花旗參嘅水亦一齊放入煲內，再滾30分鐘後離火，放入真空煲內，因用真空煲不能用大火，所以全程用中火煲。到飲時從真空煲取出內煲，稍加熱及加入適量鹽便可飲用。
由於晚上11點左右才放入真空煲，到第二朝起床煲湯已經煲好，而且仲係熱，所以無需加熱就已經可以飲。真空煲真係好用呀...^_^
2 Comments:
嘩~ 搞到我都好想飲湯呀~
我唔識用真空煲/壓力煲，係咪好方便架? 同明火煲會唔會有唔同架? 搞到我好想知tim。因為大堡主都好鍾意飲湯，但我唔識所好少煲>.<
小堡主
我覺得用明火同用真空煲最大分別係可以慳番d煤氣，仲唔需要顧住睇火同唔會煲乾水，你可以出街前煲一陣後放入真空煲，咁你2/3個鐘後返屋企就可以有湯飲。至於用明火或真空煲所需時間，其實都係一樣，用明火煲2小時其實用真空煲都係需要2小時。仲有用真空煲嘅存熱時間較長，一般響真空煲放5-6小時d湯都仲係熱架。真空煲好處大致係咁，至於壞處可能有人覺得始終煲湯都係用明火會好d，但我覺得兩者冇乜分別。
至於使用方法，只要將材料放入真空煲個內煲中加熱(內煲係可以直接用火加熱，同一般嘅煲係一樣)，煲滾半小時後熄火，將整個煲放入真空煲內咁就得架啦，飲前取出視乎情況可稍為加熱及加鹽便可飲用。
你都買番個真空煲咁咪可以煲多d湯水畀大堡主飲囉，仲有你又可以滋潤下嘛...^_^
Post a Comment
<< Home