熱情鬆餅
由於一大碗熱情果汁放咗響雪櫃差唔多2星期啦，其實都唔知d熱情果汁放唔放得咁耐，所以昨晚用咗一半來整熱情鬆餅。今次焗出來嘅效果比之前用熱情果汁來整小蛋糕嘅效果好，不過就唔及小蛋糕香，同時食落亦冇小蛋糕咁有少少酸酸甜甜嘅味道，等我下次整鬆餅時用多d熱情果汁代替牛奶嘅份量，睇吓焗出來會唔會香d好味d。
熱情鬆餅(8個中型紙杯份量)
材料:
麵粉 270g
糖 100g
泡打粉 3tsp
鹽 3/8tsp
蛋 3隻
牛油溶液 82g
牛奶 75g
熱情果汁 100g
雲喱拿香油 1tsp
做法:將蛋打散後加入牛油溶液、牛奶、熱情果汁及雲喱拿香油攪匀，然後拌入已篩過嘅麵粉、糖、泡打粉及鹽，將麵糊倒入紙杯，再放入已預熱焗爐用200度焗23分鐘，焗好將鬆餅留在焗爐內5分鐘後才取出放涼。
( 哎呀...我打打吓個食譜才發現，原來我唔記得將牛奶同熱情果汁嘅份量加大，因為原食譜係用2隻蛋嘅份量，但我就3隻蛋份量，其他所有材料我都記得加大，唯獨牛奶同熱情果汁嘅份量就唔記得加大，唔怪得拌匀所有材料後嘅麵糊比較"杰"啦。真係失策啦~~~ )
9 Comments:
哇哇,Shirley,妳的熱情鬆餅好靚呀...沒有熱情果的季節,我想起香橙鬆餅,香檸鬆餅,西柚鬆餅......
moon哥
我見到界限街警察遊樂會斜對面(麗都火鍋後幾個鋪位)個蔬果檔仲有熱情果賣呀，不過我見果皮嘅顏色就比1-2個月前賣嘅明顯冇咁紅色，可能係冇咁靚同冇咁好味。
哈哈...我雪櫃仲有約250-300ml嘅熱情果汁，唔知放咗響雪櫃成2-3個星期會唔會變壞呢? (不過今次d熱情鬆餅都係用依d放咗咁耐嘅果汁做，我食過都冇事喎...^_^)我打算試吓用埋d果汁來做日式熱情果芝士蛋糕，用熱情果汁代替部份牛奶份量，唔知得唔得呢...
好吸引呀, 是用新鮮熱情果榨汁嗎?
泡泡茶
係就係用新鮮熱情果榨汁，但係d果汁仲算唔算新鮮呢，咁就答唔到啦。因為d熱情果汁榨出來已放在雪櫃差不多2星期，所以你話仲算唔算係新鮮呢?
vanlily
heheheee我整咗8個中型muffin，已經成為我同老公連續3日嘅早餐啦。
下次不用分3日食啦~
call 我 同 vanlily 幫你分咗佢麻~ 我地樂意到極啦~ ^0^v
無問題，下次整多d一齊食囉，friend嘛...不過唔好食都要食晒佢架...^_^
Shirley
雪2-3個星期,應該僅僅還可以,再久就不行了吧.....除非放在冰格啦,可保存久一點.
日式熱清果芝士餅,我想都可以一試喎,試完分享吓啦
moon哥
我仲未得閒試整日式熱情果芝士餅，過多幾日睇吓有時間整咗再post上來畀大家睇吓啦，另外我又想跟maymok整熱情果梳乎里，務求盡量消滅雪櫃內嘅熱情果汁...^_^
Post a Comment
<< Home